សម្តេច ហ៊ុន សែន ឱ្យគិតគូរផ្អាកពិធីបុណ្យភ្ជុំបិណ្ឌ
- 2021-09-23 02:00:28
- ចំនួនមតិ 0 | ចំនួនចែករំលែក 0
សម្តេច ហ៊ុន សែន ឱ្យគិតគូរផ្អាកពិធីបុណ្យភ្ជុំបិណ្ឌ
ចន្លោះមិនឃើញ
សម្តេចនាយករដ្ឋមន្រ្តី ហ៊ុន សែន តាមរយៈសារសំឡេងនៅថ្ងៃទី២៣កញ្ញានេះ បានណែនាំឱ្យពិចារណាលើការផ្អាកពិធីបុណ្យកាន់បិណ្ឌ និងភ្ជុំបិណ្ឌ ឬកាត់បន្ថយ ឬយ៉ាងណា ដើម្បីទប់ស្កាត់ការឆ្លងរាលដាលជំងឺកូវីដ១៩ បន្ទាប់ពីមានការផ្ទុះករណីឆ្លងនៅវត្តមួយចំនួន ពិសេសវត្តចំពុះក្អែក។
សម្តេចតេជោ បានបង្ហាញការបារម្ភថា បើនៅបន្តការប្រារព្ធពិធីបុណ្យភ្ជុំបិណ្ឌបែបនេះ ហើយមានការឆ្លងកូវីដ១៩ គឺនឹងនាំឱ្យមានស្ថានការណ៍អាក្រក់កើតឡើងខ្លាំង ក្រោយចប់ពិធីបុណ្យប្រពៃណីនេះ ពោលគឺនឹងមានអត្រាឆ្លងខ្ពស់ប្រកបដោយហានិភ័យ។
សម្តេច ហ៊ុន សែន មានប្រសាសន៍យ៉ាងដូច្នេះថា៖
បន្ទាប់ពីបិណ្ឌ១ ចូលបិណ្ឌ២នេះ យើងឃើញថា វត្តមួយចំនួនបានផ្ទុះឡើងនូវកូវីដ១៩រួចស្រេចទៅហើយ។ ស្ថានភាពនេះ បានបង្កើតជាការកង្វល់ដ៏ធំរបស់ខ្ញុំ។ ប្រសិនបើមានការចម្លងបែបនេះ វាច្បាស់ណាស់ថា បញ្ហាកូវីដ នឹងកើតឡើង បើសិនត្រឹមតែ ២០ ឬ ៥០% នៃវត្ត ទូទាំងប្រទេស យើងនឹងមានកន្លែងឆ្លងរហូតទៅដល់ជាង ២ពាន់វត្ត ហើយការឆ្លងនោះ វានឹងរាលដាលធ្ងន់ធ្ងរចូលក្នុងសហគមន៍គ្មានទីចន្លោះនោះទេ។
ខ្ញុំសូមសម្តេចព្រះសង្ឃរាជទាំង២គណៈ សម្តេចព្រះសង្ឃនាយក សូមព្រះមេត្តា ពិចារណា តើគួរធ្វើយ៉ាងណា ក្នុងកាលៈទេសៈដ៏លំបាកនេះ។ ប្រសិនបើយើងបន្ត លទ្ធផលដែលយើងទទួលបានកន្លងមកនេះ គឺនឹងមានការរីករាលធ្ងន់ធ្ងរហួសពីការគិត។ ក្នុងរយៈពេល១៥ថ្ងៃ ពីថ្ងៃកាន់បិណ្ឌ រហូតដល់ភ្ជុំ តើយើងមានមនុស្សប៉ុន្មានពាន់ ប៉ុន្មានម៉ឺននាក់នឹងត្រូវឆ្លង ប្រសិនបើការផ្ទុះនៅតាមវត្ត។ ខ្ញុំសូមអំពាវនាវឱ្យក្រសួងសុខាភិបាល ពិចារណា តើយើងគួរផ្អាកនូវពិធីនេះបានឬទេ ឬកាត់បន្ថយតាមរបៀបណាមួយ ដែលអាចធ្វើទៅបាន៕