រោងចក្រផ្គុំ និងដំឡើងរថយន្ត Ford នឹងលេចចេញជារូបរាងនៅខេត្តពោធិ៍សាត់ ឆាប់ៗនេះ
- 2021-09-14 00:48:01
- ចំនួនមតិ 0 | ចំនួនចែករំលែក 0
រោងចក្រផ្គុំ និងដំឡើងរថយន្ត Ford នឹងលេចចេញជារូបរាងនៅខេត្តពោធិ៍សាត់ ឆាប់ៗនេះ
ចន្លោះមិនឃើញ
នាពេលឆាប់ៗខាងមុខនេះ រោងចក្រផ្គុំ និងដំឡើងរថយន្ត Ford របស់ក្រុមហ៊ុន RMA AUTOMOTIVE (CAMBODIA) CO.,LTD អាចនឹងលេចចេញជារូបរាងនៅក្នុង ទឹកដីខេត្តពោធិ៍សាត់។
លោក ម៉ៅ ធនិន អភិបាលខេត្តពោធិ៍សាត់ និងជាគណៈកម្មការអន្តរក្រសួង ស្ថាប័ន របស់ក្រុមប្រឹក្សាជាតិអភិវឌ្ឍន៍កម្ពុជា/គណៈកម្មាធិការវិនិយោគកម្ពុជា មានប្រសាសន៍តាមរយៈ Zoom លើកឡើងថា៖ «រោងចក្រផលិតរថយន្ត Ford នឹងធ្វើត្រូវបង្កើតឡើងនៅក្នុង ភូមិសាវ័ន ឃុំស្នាអន្សា ស្រុកក្រគរ មានលទ្ធភាពស្រូបយកកម្លាំងពលកម្មប្រមាណ ៥០០ នាក់សម្រាប់ខ្សែសង្វាក់ផលិតកម្ម ឆ្លើយតបទៅនឹងតម្រូវការទីផ្សារក្នុងស្រុក។»
ឆ្លងកាត់កិច្ចប្រជុំនេះលោក ម៉ៅ ធនិន គាំទ្រយ៉ាងពេញទំហឹង ចំពោះគម្រោងនេះ។ ខេត្តពោធិ៍សាត់ ត្រូវបានទទួល នូវមរតកអមតៈជាច្រើន ដែលថ្ងៃនេះទទួលបាននូវមរតកថ្មីមួយបន្ថែមទៀត គឺរោងចក្រផ្គុំ និងតម្លើងរថយន្ត Ford ក្នុងស្រុកក្រគរ នៃខេត្តពោធិ៍សាត់។
កាលពីព្រឹក ថ្ងៃទី១៤ ខែកញ្ញា ឆ្នាំ២០២១ មានកិច្ចប្រជុំមួួយ ដោយក្រុមប្រឹក្សាជាតិអភិវឌ្ឍន៍កម្ពុជា និង គណៈកម្មាធិការវិនិយោគកម្ពុជា បានពិភាក្សាលើ គម្រោងវិនិយោគរោងចក្រផ្គុំ និងតម្លើងរថយន្ត (ផលិតចែកចាយលក់ និងសេវាកម្ម) របស់ក្រុមហ៊ុន RMA ។
ថ្លែងក្នុងកិច្ចប្រជុំ លោក ងួន សាំង នាយកប្រតិបត្តក្រុមហ៊ុន RMA បានឲ្យដឹងថា ក្រោយពីសាងសង់រោងចក្ររួចរាល់ហើយ ក្នុងនោះនឹងមានពីរម៉ូឌែលត្រូវតំឡើងមុនគេគឺ រថយន្ត Ford Ranger និងរថយន្ត Ford Everest ។ ចំពោះគម្រោងក្នុងឆ្នាំដំបូងនឹងផលិតឲ្យបាន ៤៥០០ គ្រឿង និងបន្តកើននៅឆ្នាំបន្តបន្ទាប់។
លោកអភិបាលខេត្ត មានក្តីសង្ឃឹមយ៉ាងមុតមាំថា៖ «រោងចក្រនេះបង្កើតនៅក្នុងទឹកដីនៃខេត្តពោធិ៍សាត់ នឹងធ្វើឱ្យមានការលើកកម្ពស់នូវជីវភាព កាត់បន្ថយភាពក្រីក្ររបស់ប្រជាពលរដ្ឋក្នុងខេត្ត ជាពិសេសគឺយើងទទួលបាននូវការស្រូបយកទីផ្សារពលកម្ម ទាំងនេះគឺជាការចូលរួមចំណែកយ៉ាងធំធេងណាស់ ក្រោមម្លប់នៃសន្តិភាព ដែលសម្តេចបានយកអាយុជីវិតទៅប្តូរ ទើបមានការអភិវឌ្ឍនៅលើទឹកដីនៃមាតុភូមិយើង និងនៅក្នុងខេត្តពោធិ៍សាត់របស់យើងខ្ញុំ៕»