Taylor Swift ដូចបានបញ្ជាក់ថា Justin Bieber ក្បត់ចិត្ត Selena Gomez មែន
- 2019-07-01 21:00:31
- ចំនួនមតិ 0 | ចំនួនចែករំលែក 0
Taylor Swift ដូចបានបញ្ជាក់ថា Justin Bieber ក្បត់ចិត្ត Selena Gomez មែន
ចន្លោះមិនឃើញ
Taylor Swift បានធ្វើឲ្យជ្រួលច្របល់ពិភពសិល្បៈ ក្រោយពីបង្ហាញការកើតទុក្ខមិនសុខចិត្តពេលដឹងថាចម្រៀងរបស់នាងពីមុនៗមកត្រូវបានលក់ទៅឲ្យក្រុមហ៊ុនដែលកាន់កាប់ដោយ Scooter Braun ដែលជាអ្នកគ្រប់គ្រងតារាចម្រៀង។
ដោយអះអាងថាត្រូវបាន Scooter ធ្វើបាបជាច្រើនឆ្នាំ Taylor បានបង្ហោះសារលើគណនីបណ្ដាញសង្គមផ្ទាល់ខ្លួនកាលពីថ្ងៃអាទិត្យ រៀបរាប់អំពីអារម្មណ៍មិនសប្បាយចិត្តដែលចម្រៀងរបស់នាងពេលបង្កើតនៅផលិតកម្មចាស់ Big Machine បានធ្លាក់ដល់ដៃ Scooter ដែលគ្រប់គ្រងតារាចម្រៀងផ្សេងទៀតដូចជា Justin Bieber និង Arina Grande ជាដើម។
ក្រុមហ៊ុន Ithaca របស់ Scooter បានទិញយកផលិតកម្ម Big Machine ពីស្ថាបនិក Scott Borchetta ជាមួយកិច្ចព្រមព្រៀងតម្លៃ ៣០០ លានដុល្លារ។ Taylor បានជ្រកក្រោមផលិតកម្មនេះតាំងពីឆ្នាំ ២០០៦ រហូតដល់ពេលចេញអាល់ប៊ុម Reputation នៅឆ្នាំ ២០១៧ រួចទើបទៅនៅផលិតកម្ម Universal Music Group វិញ។
ការលក់ក្រុមហ៊ុននេះបានហាមឃាត់មិនឲ្យ Taylor ធ្វើជាម្ចាស់កម្មសិទ្ធិអាល់ប៊ុមចម្រៀងចំនួន ៦ ដំបូងរបស់ខ្លួន។ Taylor បានរៀបរាប់ដូចខាងក្រោមនេះ ៖
“រាប់ឆ្នាំមកហើយ ខ្ញុំបានសុំ និងអង្វរករនូវឱកាសមួយដើម្បីបានធ្វើជាម្ចាស់កម្មសិទ្ធិនៃការងាររបស់ខ្ញុំ។ ខ្ញុំត្រូវបានគេឲ្យឱកាសដោយចុះកុងត្រាជាមួយ Big Machine ឡើងវិញ ហើយអាចក្លាយជាម្ចាស់អាល់ប៊ុមចម្រៀងមួយ សម្រាប់អាល់ប៊ុមចម្រៀងថ្មីមួយដែលឲ្យផលិតកម្ម”។
“ខ្ញុំបានធ្វើការសម្រេចចិត្តដ៏ឈឺផ្សារ ដោយលះបង់នូវអាល់ប៊ុមចម្រៀងដែលខ្ញុំផលិត។ ខ្ញុំទើបដឹងថា Scooter Braun ទិញយកអាល់ប៊ុមចម្រៀងខ្ញុំ ពេលដែលការទិញបានប្រកាសដល់ពិភពលោក។ Scooter បានដកហូតការងាររបស់ខ្ញុំ ទាំងដែលខ្ញុំមិនត្រូវបានផ្ដល់ឱកាសឱ្យទិញ”។ Taylor បន្ថែមថានេះជារឿងហេតុដ៏អាក្រក់មួយរបស់នាង។
ក្រោយពី Taylor Swift បានបង្ហាញអារម្មណ៍ពិតរបស់ខ្លួន មានតារាមួយចំនួនបានចូលរួមសម្ដែងការគាំទ្រផ្ដល់កម្លាំងចិត្តឲ្យដូចជា Todrick Hall, Halsey, Iggy Azalea, Miley Cyrus ហើយក៏មានតារាខ្លះបានចេញមុខការពារ Scooter Braun ផងដែរដូចជា Demi Lovato និង Justin Bieber ជាដើម។
រឿងរ៉ាវចម្រូងចម្រាសរវាង Taylor Swift និង Scooter Braun ក៏ទំនងជាមានពាក់ព័ន្ធនឹង Selena Gomez ផងដែរ។ ព្រោះថា Taylor បានចុច Like លើការបង្ហោះរបស់អ្នកគាំទ្រដែលមានម្នាក់សរសេរថា ៖ "អ្នក (Justin) បានក្បត់មិត្តល្អ (Selena) របស់នាង និងបានឈរខាងបុរសដែលធ្វើបាបនាង គិតចង់ឲ្យនាងអញ្ជើញអ្នកហូបតែទៀតមែន? ឆាប់ចេញទៅ"។ ការចុច Like នេះធ្វើឲ្យអ្នកគាំទ្រភ្ញាក់ផ្អើល ដោយគេជឿជាក់ថា Taylor ហាក់ដូចបានបញ្ជាក់ថា Justin ក្បត់ចិត្ត Selena មែន៕
ចុចអាន ៖ ម្ចាស់បទ "Old Town Road” សារភាពថាស្រឡាញ់ភេទដូចគ្នា