ទំនាក់ទំនងអារ៉ាប៊ីសាអូឌី-កាណាដា កាន់តែអាក្រក់ ខណៈផ្ទុះការគំរាមវាយប្រហារកាណាដា

2018-08-06 19:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសអារ៉ាបីសាអូឌី កាលពីថ្ងៃទី៦ ខែសីហា ២០១៨ ម្សិលមិញ បានកោះហៅអគ្គរាជទូតរបស់ខ្លួនប្រចាំប្រទេសកាណាដា មកអារ៉ាប៊ីសាអូឌីវិញ ហើយបានបណ្ដេញអគ្គរដ្ឋទូតកាណាដាប្រចាំអារ៉ាប៊ីសាអូឌី លោក Dennis Horak ឲ្យចាកចេញក្នុងរយៈពេល ២៤ម៉ោង ដោយដាក់ឈ្មោះលោកថា "ជាជនមិនស្វាគមន៍"។ ជាងនេះទៅទៀត អារ៉ាប៊ីសាអូឌីបានផ្អាករាល់ប្រតិបត្តិការវិនិយោគ និងជំនួញថ្មីៗទាំងអស់ជាមួយកាណាដា។

ព្រះមហាក្សត្រអារ៉ាប៊ីសាអូឌីទទួលស្វាគមន៍លោក ដូណាល់ ត្រាំ ប្រធានាធិបតីអាមេរិក នៅក្រុង Riyadh ប្រទេសអារ៉ាប៊ីសាអូឌី កាលពីឆ្នាំ២០១៧ / រូបភាព៖ Reuters

ការប្រកាសរបស់អារ៉ាប៊ីសាអូឌីដូច្នេះ គឺក្រោយលោក Chrystia Freeland រដ្ឋមន្រ្តីការបរទេសកាណាដា បានរិះគន់អារ៉ាប៊ីសាអូឌី ជុំវិញការចាប់ខ្លួនសកម្មជនសិទ្ធិមនុស្ស និងស្នើឲ្យមានការដោះលែងជាបន្ទាន់។

ក្រោយការប្រកាសផ្អាកទំនាក់ទំនងការទូតរបស់អារ៉ាប៊ីសាអូឌីជាមួយកាណាដា អារ៉ាប៊ីសាអូឌីបានផ្អាកជើងហោះហើរជាច្រើន ទៅកាន់ក្រុង Toronto របស់កាណាដា កាលពីថ្ងៃទី៦ ខែសីហា ២០១៨ ម្សិលមិញ។ ជាមួយគ្នានេះ អារ៉ាប៊ីសាអូឌីកំពុងរៀបចំផ្ទេរ សិស្ស និងក្រុមគ្រសាររបស់ពួកគេចំនួន ១២០០០នាក់ ចេញពីកាណាដា ទៅកាន់ប្រទេសផ្សេងទៀត ដូចជាអាមេរិកជាដើម។ នេះបើតាមការបញ្ជាក់របស់មន្រ្ដីជាន់ខ្ពស់អារ៉ាប៊ីសាអូឌី។

ប៉ុន្ដែអ្វីដែលគំរាមដល់បញ្ហាសន្ដិសុខនោះគឺ គណនី Twitter ដែលមានការផ្ទៀងផ្ទាត់ (Verified) មួយ ដែលមាន Follower ចំនួន ៣៥ម៉ឺននាក់ បានបង្ហោះគំរាមវាយប្រហារអគារ CN Tower របស់កាណាដា ដូចការវាយប្រហាររបស់ថ្ងៃទី១១ ខែកញ្ញា លើអគារពាណិជ្ជកម្មពិភពលោក នៅអាមេរិក។ ប៉ុន្ដែ ៦ម៉ោងក្រោយ ការបង្ហោះនៅលើគណនីនោះ ត្រូវបានលុបចោលវិញ៕