មេបក្សមូលដ្ឋាន ប្រាប់មូលហេតុដែលចូលរួមការបោះឆ្នោតខាងមុខនេះ

2018-05-28 01:37:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក យ៉េង វិរៈ ប្រធានគណបក្សប្រជាធិបតេយ្យមូលដ្ឋាន បានថ្លែងបញ្ជាក់ថា ការចូលរួមបោះឆ្នោតជ្រើសតាំងតំណាងរាស្ត្រ គឺជាឱកាសកសាងដំណើរលទ្ធិប្រជាធិបតេយ្យ និងការស្តារប្រជាធិបតេយ្យនៅកម្ពុជា។ ការថ្លែងបញ្ជាក់នេះ បានធ្វើឡើងក្នុងវេទិកាសាធារណៈស្តីពីដំណើរការប្រជាធិបតេយ្យការបោះឆ្នោត និងការចូលរួមរបស់គណបក្សប្រជាធិបតេយ្យមូលដ្ឋាន កាលពីរសៀលថ្ងៃទី២៧ ខែឧសភា ឆ្នាំ២០១៨ នៅស្នាក់ការគណបក្សប្រជាធិបតេយ្យមូលដ្ឋាន នៅសង្កាត់ភ្នំពេញថ្មី ខណ្ឌសែនសុខ។

លោកបន្តថា សារៈសំខាន់នៃការបោះឆ្នោត ជាធាតុសំខាន់មួយ គឺការបោះឆ្នោតដោយសេរី ដោយមិនមានការបង្ខិតបង្ខំ និងត្រូវផ្តល់ឱកាសឱ្យគណបក្សនយោបាយទាំងអស់ចូលរួមបោះឆ្នោត។

លោក យ៉េង វិរៈ ថ្លែងនាពេលកន្លងមក

ចំណែកលោក សាម អ៊ីន អគ្គលេខាធិការគណបក្សប្រជាធិបតេយ្យមូលដ្ឋាន បានថ្លែងបញ្ជាក់ថា គណបក្ស បានសម្រេចចិត្តចូលរួមការបោះឆ្នោត ពីព្រោះដំណើរការបោះឆ្នោត គឺទៅមុខហើយ។

លោកថា «បើយើងមិនចូលរួមក៏គេមិនឱ្យគណបក្សសង្គ្រោះជាតិ រស់ឡើងវិញដែរ។ បើមិនចូលរួមបោះឆ្នោត គឺទុកឱ្យគណបក្សប្រជាជនកម្ពុជា គ្រប់គ្រងអាសនៈនៅក្នុងរដ្ឋសភា។ យើងមិនចង់ឲ្យគណបក្សប្រជាជនកម្ពុជា បានសំឡេងលើសពី ២/៣ និងមិនចង់ឱ្យមានការកែប្រែរដ្ឋធម្មនុញ្ញស្រេចតែចិត្តនោះទេ»។

លោក សាម អ៊ីន ថ្លែងក្នុងវេទិកាសាធារណៈរបស់គណបក្សប្រជាធិបតេយ្យមូលដ្ឋាន កាលពីថ្ងៃទី២៧ ខែឧសភា ឆ្នាំ២០១៨ (រូបថត៖ ផ្តល់ឱ្យ)

លោកបន្តថា ក្រោយការបោះឆ្នោត អន្តរជាតិនឹងបន្តសហការជាមួយរដ្ឋាភិបាល ដើម្បីផលប្រយោជន៍ទៅវិញទៅមក។ លោកថា បើគណបក្សមូលដ្ឋានចូលរួមបោះឆ្នោត គឺអាចស្តារលទ្ធិប្រជាធិបតេយ្យ និងអាចឱ្យមានសេរីភាពអង្គការក្រៅរដ្ឋាភិបាលឡើងវិញ សេរីភាពសារព័ត៌មាន និងចូលរួមផ្តល់ផលប្រយោជន៍ជាតិបានច្រើន។

លោក សាម អ៊ីន បានអះអាងថា តាមទិន្នន័យបោះឆ្នោត គណបក្សប្រជាធិបតេយ្យមូលដ្ឋាន មានលទ្ធភាពឈ្នះមានច្រើន៕

អត្ថបទ៖ សោភា