គណបក្សប្រជាជនកម្ពុជា ទទួលបានអាសនៈទាំង៥៨ នៅព្រឹទ្ធសភា

2018-03-02 23:04:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅព្រឹកថ្ងៃទី០៣ ខែមីនានេះ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសជាផ្លូវការ នៃលទ្ធផលការបោះឆ្នោតជ្រើសតាំងសមាជិកព្រឹទ្ធសភា អាណត្តិទី៤ ដែលបានប្រព្រឹត្តទៅកាលពីថ្ងៃទី២៥ ខែកុម្ភៈ ឆ្នាំ២០១៨។

លទ្ធផល ដែលបានបង្ហាញដោយ គ.ជ.ប គឺគណបក្សប្រជាជនកម្ពុជា ទទួលបានអាសនៈចំនួន៥៨។ ចំណែកគណបក្សហ៊្វុនស៊ិនប៉ិច គណបក្សខ្មែររួបរួមជាតិ និងគណបក្សយុវជនកម្ពុជា គឺមិនទទួលបានអាសនៈនោះទេ។

លោក ហង្ស ពុទ្ធា អ្នកនាំពាក្យ គ.ជ.ប បានថ្លែងប្រាប់ខ្លីៗ នៅព្រឹកនេះថា លទ្ធផលផ្លូវការ នៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ គឺគណបក្សប្រជាជនកម្ពុជា ទទួលបានអាសនៈចំនួន៥៨ នៅក្នុងព្រឹទ្ធសភា។ ចំណែកអាសនៈចំនួន ៤ទៀត គឺចំនួនពីររូបតែងតាំងដោយព្រះមហាក្សត្រ និងចំនួនពីររូបទៀត បោះឆ្នោតជ្រើសតាំងដោយរដ្ឋសភា។

លោកបញ្ជាក់ថា សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ ឆ្នាំ២០១៨ ចំនួនអាសនៈសរុប៦២ ដោយក្នុងនោះបោះឆ្នោតជ្រើសតាំងមានចំនួន ៥៨អាសនៈ។ ដោយឡែកសមាជិកព្រឹទ្ធសភាចំនួន ០៤រូបទៀត ត្រូវបានចាត់តាំងដោយព្រះមហាក្សត្រ ចំនួន ០២រូប (សម្តេចព្រះរាជបុត្រីព្រះអនុជ នរោត្តម អរុណរស្មី និងលោកស្រី អ៊ុំ សូម៉ានីន)។ ហើយចំនួន០២រូបទៀត ត្រូវបោះឆ្នោតជ្រើសតាំងដោយរដ្ឋសភា ប៉ុន្តែរដ្ឋសភានៅមិនទាន់បោះឆ្នោតជ្រើសរើសនៅឡើយទេ។

សរុបសមាជិកព្រឹទ្ធសភា នីតិកាលទី៤ នេះ មានចំនួនសរុប៦២រូបដែលចំនួននេះ កើនលើសពីព្រឹទ្ធសភា នីតិកាលទី៣ ចំនួន ០១រូប។

ចំណែកគណបក្សនយោបាយចំនួន ៣ទៀត គឺគណបក្សហ៊្វុនស៊ិនប៉ិច គណបក្សខ្មែររួបរួមជាតិ និងគណបក្សយុវជនកម្ពុជា ដែលមិនទទួលបានអាសនៈ បានចេញប្រកាសគាំទ្រចំពោះលទ្ធផលបឋម ដែលប្រកាសដោយ គ.ជ.ប៕

អត្ថបទ៖ សោភា